اروع الابداع لعبدالحسين الحلفي

نشع من اشوفنك عليه جاي
واسكر حيل اذا اشبك اطوطح
ويصير العيد مااتم لون ماجيت
وبيوم الطبك لو جيت افرح
واكول اربحت وانه وياك خسران
واكول اخسرت لو وي غيرك اربح
كرجوحه القلب ومحبتك عيد
وبماانك طفل حقك تمرجح
حلو وتلمع وتكتل انته اذن سيف
اذن عذرك وياك وانته تجرح
وماافكر واخاف انته تذبحني
افكر خاف اتعبك وانته تذبح
اعرفنك غلط بس مستعز بيك
وكمت لخاطرك حتى اكره الصح
تسوة الدنيه عندي من اكعد
وبدونك كلشي ماتسوة دنيتي
امن اطب البيتكم اشبك على الباب
ويشبكك بابنه من تطب بيتي
فرق مابين عمري وعمرك هواي
وكمت لخاطرك اصبغ لحيتي
اتاذة اذا وي غيرك ارتاح
وحيل ارتاح اذا منك منيتي
وي غيرك من يردلي العمر مااريد
واريد وياك لو يمك منيتي
عليك العين تبجي ليل ونهار
واكله اشعطلج شو مابجيتي
قضيتي وياك ابد خلتني ماشوف
وادعي من الله لا تنحل قضيتي
يوصي اهله بجهاله الرايد يموت
وبس اسمك لكو اهلي بوصيتي
اعلى غيرك مانحت مابيه علنوح
وعليك اشكد حلو يونسني نوحي
كضيت ازيارتي بس اندعيلك
ونسيت وداعتك اندعي لروحي
جنت من روحي ضايج كبل ملكاك
وكل ساعه اكل روحي دروحي
لا هسه من بعد روحي مااضوج
اضوج اشلون وانته الصرت روحي
انشع حيل من تلجمني الجروح
واظل مقهور لو طابت اجروحي
اعتبرت الي يداووني يلجمون
وتلجم بيه واعتبرك علاجي
سجين بحبك انه متاني الافراج
واصلي واندعي لا يجي افراجي
محتاج لحنانك حيل محتاج
ومحد غيرك ايسدلي احتياجي
واذا عطشان يلكه نهر مثلك
مامعقوله يفتر علسواجي
تحركني بقصد واطلع الروح
واكل للروح مايقصد احراجي
ابو الطبع المزاجي شكد اكرهنه
واموت عليك جي طبعك مزاجي